Lu abegosu yía tentare ser oxetivu, nun cayere nel servilismu y atrevese a falare cun toos y de toos, peru nun solu pa lu bonu, sinón tamién pa lu malu, ou cenciellamente p'aldericare cualesquiera tema.
Yía abegosu, purque a la primeira de cambiu finas etiquetau, purque a unos y outros nun yes presta que se fale bien ou mal d'eillos, ou de los outros. Enclusu nun presta que se fale cun outros, ensín más.
Mueitas vueltas tengu dichu que tou yía frutu l'odiu y sobru tou de la intolerancia. Paez que ties de tare cun unos ou cun outros ensin salite del camín. Yía dicire, cumu autómatas, sigire al líder y nun albidrare más que pal líder.
En cuantu dalgien entama a salise de la norma, a falare de tou y cun tous, fina siendu etiquetau dende un llau y l'outru, dalgu que mueitas vueltas da mancor de tiesta pur nun sabere si ta faciendu dalgu correutu.¿Remordimientu ou sintimientu de culpa? nun tien purque, pur dicire lu qu'unu barrunta nun tien purque dare más mancores de tiesta, sinón más bien tranquilidá pur glayare lu que camienta sobru'l mundu y tolu que l'alrodia Yía ciertu que nun presta tar en dengún llau pur mieu a finare solu.
Tou estu solu tien duas salidas, ou se fina sumisu a los de la cuerda, ou se finan cunos mancores de tiesta dirixendu tou a reforciar la sua independencia presonal.
Una independencia presonal que nun yía fácil tenere siempres, pur mueitu que la xente diga que siempres diz lu que camientan ou lu que yes peta. Nun yía totalmente ciertu, la mayoría las vueltas, seya pur vergoña, pur nun querere ser etiquetaos ou pur mieu a finare aislaos, la xente nun diz lu que camienta, sinón lu qu'outros quieren escuitare.
Una independencia presonal cheva en peligru dende que dalgu que fizu chamase "marketing" surdiou pa tentare camudare l'opinión de la xente sobru cualesquiera tema. Un "marketing" que dende va tiempu a agora, yía'l día a día en tou tipu de relaciones de cualesquier organismu, asociación, empresa, etc... cuna xente. Y yía la ferramienta pa vendere tantu produtos, cumu ideyas. Una ferramienta que furrula ca vuelta miyor, ca vuelta cun más agresividá, ata'l puntu de facere que quien nun caiga nas suas redes, fine siendu un pária dientru d'una sociedá marcada pul "marketing"
Dalgunos se tomarán tou estu a chufla, que nun va cun eillos. Buenu, que caún camiente lu que ye pete, peru que gueye arrodiu a vere si de verdá yía independiente y aceuta que tou'l mundu pueda falare, siempres dende'l respetu, de tou, ensín dire etiquetandu al que nun sige las suas normas, ou si pul escontrariu tien ganas de dire marcandu a quien nun camienten cumu caún.
L'independencia presonal a la fin yía un animal en peligru d'esticiòn, pur mueitu que la xente, nin lu creya, nin lu aceute. De toos depende protexelu, anque manque.
No hay comentarios:
Publicar un comentario