jueves, 23 de mayo de 2013

Tres la resaca, tou ta cumu siempres, glayandu y chistandu.

Van deillos días dende la manifestación en Salamanca y la resaca inda continua, sobru tou nas redes sociales que sigen espublizandu las mesmas semeyas y los mesmos artículos una y outra vuelta. Peru.... tras la resaca ¿que?


Pues, tres la resaca, más de lu mesmu, nada de nada. Tou sige cumu siempres, vuelta a chamare pa unu ou outru sitiu pa vociare, peru ensín nada concretu que premita gueyar una ventana d'asperanza 



Paez que yá tá tou feichu pur unos meses, lluegu outra resaca y outra... y outra, asina tá'l llïonesismu.

Suenan voces, rumores y outros dicires cuna ñuncia d'una nueva vía política, peru cumu siempres, son esu, voces, rumores y outros dicires, illusiones que nun chegan a plasmase en momentu dalu. Non pur falta ganas, que tolos llioneses tienen, sinon pur falta compromisu. Nun yía la primeira, ni sedrá la cabeira vuelta que se proyeute una nueva vía  y nun sedrá la primeira, nin sedrá la cabeira que la falta d'humildá, compromisu y flesibilidá, dará'l traste cun tolu proyeutau.

D'outra parte tá'l regalín "quiciabesmente envenenau" a UPL na encuesta del diariu "La Razón", peru d'esu miyor nun falare, sólu val pa qu'UPL siga cul sou cortixu ensín decatase de lu que pasa fuera d'él.

Aparte d'estu, nada nuevu baxu'l cielu. El llionesismo sige perdiu, cun miedu a dar la cara.

Tornamos a la rialidá del llionesismu, una outra vuelta torna la discusión sobru cumu yía ou tien de sere la bandeira, que si un color ou outru, que si el llión d'un xeitu ou outru, outra vuelta a repartire carnés de llïonesismu , ou a falare sobru'l territoriu , peru nin una alegación escontra'ĺ proyeutu de reforma territorial a la que yá se chega tarde pur parte'l llïonesismu, y esu ensín esqueicere las lleiciones de llïonesismu, cumu si esistiesen catedráticos na materia, ect, ect, en poucas pallabras, mareandu la perdiz pa nun facer NADA. 


Podría camentase que tres la manifestación más grande de los cabeiros años dalgu camudaría, peru cumu yía habitual, tou torna a sere cumu siempres. Mueitas illusiones, mueitas ideyas, dengún compromisu. Y pur supuestu, una outra vuelta las milenta bandeiras, salvu las esceiciones de siempres, recueyendu polvu ensín volver a ondeyare.

La triste rialidá del llionesismu qu'outra vuelta s'entruga.... ¿Y agora que? ou tamién ¿ata cuandu? ou quiciabes ¿onde tán tolos que glayaban y agora chistan?

Seya cumu seya, los qu'atacan al Pais Llïonés solu temen una cousa, y esa cousa yía la perdida de votos. Mientras toos esos que tantu glayan escontra'l País Llïonés y solu miran pal autual modelu autonómicu fracasau nun vean pelligrare los sous puestines, tou sigirá igual. A vere cuandu los llioneses pescanciamos d'una vuelta que pur mueitu que glayemos, solu saldremos del furacu dende una via politica fuerte y seria, nun a base de glayare guei y chistare al día sigiente, ni cun proyeutos politicos que finan siendu cortixos de cuatru collacios.

Tantu dende'l goviernu d'Hespaña, cumu dende l'enxendru autonómicu yá tien puestas las bases pa fuliminare'l Pais Llïonés, y eiqui sigimos peleandu pul color de la bandeira ou repartiendu carnés de llïonesistas. Asina nos va, tán candandu tou, y sigimos glayandu y chistandu ensín mirare pal futuru, solu pal embligu de caún.

miércoles, 1 de mayo de 2013

Mayu y 1, dia'l trabayu dinu


Pa dalgunos el día'l trabayu (mayu y 1) solu yía una fiesta los sindicatos. Yía ciertu que'l Mayu y 1 tien mueitu de vere cunos sindicatos, sobru tou cunos sindicalistas asesinaos pur defendere los dreichos los trabayadores. Y pur esu nun yía una fiesta, sinon l'alcuerdu de que los dreichos los trabayadores nun son de baldre, sinon que fonun pagos cun sangre.

Nun yía obligatoriu asistire ou tare d'alcuerdu cun unu ou outru sindicatu pa cellebrare, ou miyor dichu, reivindicare, esti día, sinon que ye obligau alcordar a dalgunos que la llucha obrera tá viva.
Y lu mesmu que tien de sere alcordau pulos gobernantes, tamién pulos sindicatos.Yía ciertu que cabeiramente dalgunos sindicatos relaxaronse más de la cunta ou nun autuaron cumu s'asperaba d'eillos, peru esu nun yía razón pa inorar esti día, sinon más bien pa tenelu más en cunta y, seya'l llau d'esos sindicatos, ou pur outru llau, nun esqueicere los que llucharon escontra los patronos que tentaban d'esclavizare a los trabayadores en vuelta de tratalos cumu presonas.

La manipulación, las mentiras, los intereses creyaos pula clas politica y empresarial sige siendu'l pior enemigu la llucha obrera.
La relaxación los sindicatos nun yía la pior problema, el gran enemigu ye la relaxación del pueblu y l'aceutación las reglas de xuegu del capitalismu ensín escrupulos.
Si el pueblu esqueice la llucha de quienes finaron los sous días pur defendere los dreichos de toos, el pueblu finará siendu l'esclavu d'un sistema que nun tien escrúpulos p'asesinar al que solu pide dinidá.

Y pa los que tienen la tentación de dicire qu'esti dia nun representa a los paraos, alcordayes que los paraos son frutu'l mesmu sistema que solu geta esclavizare a tolos trabayadores. Pulu que los paraos son sobru tou'l resultau de l'avaricia y la manipulación capitalista que nun quier ni trabayadores nin presonas, solu esclavos, ensín importare si chegan ou non a fin de mes. Y pur esu esti día tamién yía la reivindicación de tola xente qu'agora ta nel paru pula culpa d'esa avaricia y sobru tou pulas mentiras y la manipulación d'esu que chaman mercaos, peru qu'a la fin nun son más qu'esclavistas.