viernes, 22 de febrero de 2013

¿Estau la nación ou estau los partios?

¿Estau la nación ou estau los partios? Yía la entruga de los ciudadanos que nun pescancian cumu los politicos vuelven el llombu al pueblu.
Purque nel debate l'estau de la nación, dediconunse a tirase los trastos unos pa outros y non a falar de lu que priocupa a la xente.
Pa estu yía miyor nun facer un res, asína nun quedamos cumu l'estau bananeiru que somos ante'l mundu.

¿Esta yía la marca Hespaña que quieren mercar el PP y el PSOE (ente outros partios)? Pa esu yía miyor un combate nun ring de llucha llibre y se partan la cara, polu menos darían espetáculu.

Paez, ou quiciabes seya la cruda realidá, que l'único qu'importa yía salvar el traseiru de caun. Cumu dixu Montoro "que se caiga España que ya la levantaremos nosotros", dalgu que nun yía esclusiu del PP, sinon de tolos partios que deixan aparte tou solu pa entoxare'l sou egu.

Los ciudadanos ya tamos fartos de tantu "y tu más", qu'estu nun yía'l patiu'l colexu ¡coime!, estu yía'l futuru de las presonas. Nun puede xugase cuna xente que deixa de xantare pur llevar un cuscu de pan a los suos fiyos, ou nun tien onde vivire.
¿Que yía lu que quieren, un estau de primeira ou un país del tercer mundu? Purque agora lu que tien nas manos yía un país del tercer mundu, ensin dulda dalguna.

Lluegu s'estrañan qu'l pueblu marche pulas cais escontra tolos políticos ¿Qu'asperan cul exemplu que dionun nel debate l'estau la nación l'estau los partios?
Namás pur vergoña, ou pur dinidá, los afiliaos a los partios deberían esborriase del partiu, coyer el pendín  y deixar a los suos xefes cul culu al aire.
La gran entruga ¿onde ta la vergoña y la dinidá? Paez que puocos la conocen,  entoncias ¿quei diaños de politicos tenemos? A la fin, cumu suele dicise "Tenemos lu que nos merecemos" ¿ou non?

martes, 12 de febrero de 2013

Desordenación territorial

L'anhelau proyeutu de la Xunta del enxendru chamau Castiella y Llión pa finare cunas rexones hestoricas ta chegandu a la sua fin.
Pula culpa de la chamada "ordenación territorial", non solu finan cunas fronteiras provinciales, sinon tamién cunas rexonales, amesturandu y fusionandu de feitu las dos rexones, la de Llión y la de Castiella, que componen esta autonomía

Dende'l gobiernu autonómicu dedicónunse a dispreciar y ensultare tou resquiciu en defensa de la identidá llïonesa, proclamandu siempres qu'hai que gueyar al futuru y non al pasau. Esqueiciendu, pur supuestu, que'l pasau reciente solu deixanos una comunidá autonoma fracasada, seutaria y centralista.
Un pasau reciente que nas provincias llïonesas solu deixou despoblación, ruina, falta d'oportunidaes, destrución del patrimoñu, tantu hestoricu cumu natural, manipulación educativa, deficiencia d'infracadarmas, etc, etc....

A pesar d'esti pasau reciente de fracasos y mintiras, que ye frutu d'una traición hestórica, los representantes llïoneses, na sua mayoría, prefieren segir ahondandu  n'esti desastre autonómicu, defendiendu una ordenación territorial que solu servirá pa que los problemas ya conocios se multipliquen.

A nadie se le escapa que la despoblación nas comarcas llïonesas va a sere la escusa nidia pa disviare los servicios p'hacia poblaciones castiellanas, obligandu a llargos desplazamientos, amás de provocare más despoblación aún, ya que la llóxica llevanos a que los ciudadanos finen viviendu cerca d'esos servicios.
Cada vuelta vamos gueyandu cuales son las consecuencias de dicha ordenación, exemplu nidiu son los cierres d'urxencias sanitarias ou de centros d'educación secundaria en numberosos pueblos, cun escusas ensín fundamentu

¿Cuandu los llïoneses van a reacionar ante estos atropellos? ¿Tan ciegos tan, que prefieren segir callaos, antias que revelase escontra los manipuladores?
Ou espertamos, ou el País Llïonés finará siendu un desiertu pa luego convertise nuna colonia castiellana y acastiellanada, sin ningún dereichu y cun permisu de pernada pur parte del amu castiellanu.

Dalgunos camientarán qu'estu nun ye importante, que solu ye una más de los llïonesistas. Creyu que l'hestoria d'esti enxendru autonómicu deixanos l'amuesa de lu que sinifica tare cun Castiella: despoblación, probritú, abandonu, milentos de llïoneses qu'emigran pur falta d'oportunidaes, empresas que marchan pa outros llugares, en poucas pallabras, desertización d'una tierra fértil pula pasividá de los suos fiyos.
Que caun saque la suas conclusiones. Lluchare, ou finare.