jueves, 4 de julio de 2013

Construyire futuru ou asumire las perdidas

¿Construyire futuru ou asumire las perdidas?
Esta entruga nun yía sobru'l futuru d'una empresa en crisi, nin sobru'n sistema económicu cun problemas. Son entrugas sobru'l futuru de mueitas rexones a lu llargu'l mundu. Y sobru tou, pa un llïonés, yía lu que dende fuera tan preparandu pal País Llïonés (Llión, Zamora y Salamanca)

Tres lleer dalgunos proyeutos, que quiciabes yá sian más llei que proyeutu dientru poucu, tantu dende'l gobiernu autonómicu, cumu dende'l central, el futuru del País Llïones pasa pur asumire las perdas y nunca pur ganare dalgu.

Pa entamar, tolos estudios dan pur feichu'l xeitu la despoblación, castigandu cun durez a Llión y Zamora, y siendu dalgu más brandos cun Salamanca. Del mismu xeitu, nun se planteya la creyación d'empresas pa salvar esa despoblación. Nun tien dengún plan. Atrás quedonun los planes ouesti, Planes poblacionales y outros cunos mesmos nomes rebuscaos y las mesmas promesas vacias. Agora ya nun s'abellugan, yá nun hay planes.

Duos proyeutos son los responsables d'esti abandunu. Proyeutos que tienen cumu pilastres tous eisos estudios de despoblación y de "desllocalización" (creigu que yía la pallabra adecuada) de tola economía llïonesa pa outras rexones. Los proyeutos son "La llei pa la racionalización y sostenibilidá de la administración local" del gobiernu central y "La llei d'ordenación territorial" de la xunta autonómica.
Pur supuestu, estas lleis nun tan guerfanas y chevan cunsieu outras que las acompangan cul mesmu gión
Toas tien cumu base la despoblación d'unos territorios en favor d'outros. En dengún casu planteyan recuperare población y rexenerar l'economía de las rexones castigadas.

--Ante tou estu, tuvi la tentación d'esplicare deillos puntos pa tentare guetare soluciones pa esti panorama. Peru dempues de redatare unos cuantos párrafos dime cunta qu'a la fin nun serviría pa nada. Y tou yía asina purque tolos llioneses paecen saber la solución, tolos llïoneses paecen tener la formula pa salire d'esta situación. Esu si, tolos llioneses saben salir eillos solos, el restu nun tien nin ideya de nada, purque paece que cada llïonés tien pur enemigos al restu los llïoneses, purque pa cada llïonés, el restu solu son unos folgacianes que nun  facen nada pul Páis Llïonés.

Pur supuestu xeneralizare sedria un error, peru lu ciertu yía que la mayoría marca la regla, y las esceiciones son tan poucas que nun val la pena mentalas, purque de seguru nombralas solu va sirvire pa recibire más criticas.

Asina que..... ¿construyimos ou asumimos? Ta nidiu que cun nesti panorama solu queda asumire.
¿Ou non?
De seguru que dalgunos ya tan camentandu las pallabras pa criticare estas llineas, amuesa nidia de lu dichu.
Solu asperu qu'outros polu menos reflesionen y tornen a entrugase ¿construyimos ou asumimos? y pur supuestu la rempuesta seya CONSTRUYIMOS