viernes, 26 de abril de 2013

Outra vuelta, UPL sorprende

Guei mesmu espublicei una tema sobru las pallabras del procurador de UPL y lu que taba mancandu al llionesismu.

Cumu yera d'asperar dirixí duras pallabras a esti partiu por la sua falta de visión política ante'l llionesismu.

Peru lu mesmu que criticu las declaraciones de Valderas, tamién toca reconocere las cousas bonas.
Va unos minutos acabu d'enterame que UPL apoya y asistirá a la manifestación de Salamanca. Estu yía un xiru sorpresa que merez tou'l reconocimientu.

¿Pallabras desafortunadas?

El procurador nas Cortes pur UPL, AlejandroValderas, va dicire «En estos momentos, la prioridad no es tener autonomía propia», pallabras desafortunadas en bouca de quien se supone representante d'un partíu llionesista.
Yía ciertu que la crisi camuda las prioridaes y agora lu primeiru yía salvar a milentos de llioneses de la pobritú y la esclusión social, l'entruga yía ¿acasu pertenecer a esti enxendru autonómicu nun yía parte de la culpa que la crisi castigue cun mas forcia al País Llionés? entoncias ¿cual yía la prioridá?

Amás, cumu politicu, que ta onde ta gracias a los votos del llionesismo, nun puede camudar agora de camisa y vender que l'autonomía (ou cualesquir outru tipu d'autogobiernu) nun yía prioritariu.
Tou yía prioritariu, nada puede pasar a segundu planu, siempres que seya bonu pal País Llionés. Tou tien la mesma prioridá, más agora que cualesquier relaxación supone perder pa siempres cualesquier resquiciu d'esperanza.

Pur esu, tantu UPL cumu el restu'l llionesismu ta obligau a lluchar cun más forcia, ensin cedere ni un milimetru, pa sacar alantre un País LLionés que ta na pior situación de los últimos años. Y cualesquier pallabra, cualesquier declaracion, nun puede dar ni un respiru a quienes tan asperandu que'l llionesismu fine duna vuelta pur toas.

Mueitos dicen que UPL ya nun representa'l llionesismu, esu nun yía lo grave; lu grave yía que'l llionesismu en xeneral sufre las declaraciones desafortunadas de quienes dicen sere los sous representantes, seyan del partiu que seyan.

N'outras rexones, si un representante rexonalista, nacionalista, autonomista, ou lu que seya, diz dalgu similar, ya tendria rectificadas las suas pallabras a las poucas horas; eiqui, cumu siempres, la poca visión politica deixa que tou siga alantre ensin consecuencias.
Si lu que pretende yía siguire pur esi camin, lu miyor yía que UPL deixe de ser UPL y camude'l sou nome y las suas siglas pur outros que nun manquen al llionesismu. Purque a la fin, seya cumu seya, yía'l llionesismu'l que paga estos desmanes.

Nun sou a pescanciare cumu cun tantos avisos, UPL aun sigue ensin darse cunta que va pul camin enquivocau. Peru menos cumu aún los sous votantes y militantes siguen ensin revelase ante esta situación dende yá.

Las pallabras nun siempres se las cheva'l vientu, a vueltas quedan marcadas pa siempres si el enemigu puede usalas escontra outros, y esos outros agora son tolos llioneses.